މަސްވެރިކަމާއިބެހޭ ވުޒާރާގެ ޤަވާޢިދު ނަންބަރު 2025/R-3 ހުއިފިލަނޑާގެ މަސްވެރިކަން ރާވާހިންގައި، ބެލެހެއްޓުމާއިބެހޭ ޤަވާޢިދާއި، ޤަވާޢިދު ނަންބަރު 2025/R-4 ފަރުމަސްވެރިކަން ރާވާހިންގައި، ބެލެހެއްޓުމާއިބެހޭ ޤަވާޢިދަށް 2025 ޖަނަވަރީ 13 ވަނަ ދުވަހުން ފެށިގެންވަނީ ޢަމަލުކުރަން ފަށާފައެވެ. މިޤަވާޢިދަށް ޢަމަލުކުރަން ފަށާތާ 3 މަސްދުވަސް ހަމަވާ ތާރީޚުން ފެށިގެން އަންނަނިވި ފަރާތްތަކުން އެކަމަށް ޚާއްޞަ ލައިސަންސް މަސްވެރިކަމާއިބެހޭ ވުޒާރާއިން ނަގަންޖެހޭކަމަށްވަނީ ކަނޑައަޅާފައެވެ.
- ވިޔަފާރި ބޭނުމަށް ހުއިފިލަނޑާގެ މަސްވެރިކަންކުރާ އުޅަނދުފަހަރު؛
- ވިޔަފާރީގެ ބޭނުމަށް ހުއިފިލަނޑާ ޕްރޮސެސްކުރުމުގައި ހަރަކާތްތެރިވާ އެންމެހޭ ފަރާތްތަކާއި ތަންތަން؛
- ވިޔަފާރީގެ ބޭނުމަށް ފަރުމަހުގެ މަސްވެރިކަންކުރާ އުޅަނދުފަހަރު؛
- ވިޔަފާރީގެ ބޭނުމަށް ނުވަތަ އެކްސްޕޯޓްކުރުމަށް ފަރުމަސް ޕްރޮސެސްކުރުމުގައްޔާއި ތައްޔާރުކުރުމުގައި ހަރަކާތްތެރިވާ އެންމެހާ ފަރާތްތަކާއި އުޅަނދުފަހަރާއި ތަންތަން؛
- އެކްސްޕޯޓްކުރާ ފަރާތްތަކަށާއި ރިޒޯޓްތަކަށް މެދުވެރިއެއްގެ ގޮތުން ފަރުމަހުގެ ބާވަތްތައް ވިއްކާ ފަރާތްތައް ނުވަތަ ކުންފުނިތައް ނުވަތަ ކަލެކްޓަރ އުޅަނދުތައް.
މިލައިސަންސްތަކުގެ މުއްދަތާއި ފީތައް ތިރީގައި އެވަނީއެވެ.
| ލައިލަންސްގެ ބާވަތް | ލައިސަންސްގެ މުއްދަތު | ފީ (ރުފިޔާ) |
| ހުއިފިލަނޑާގެ މަސްވެރިކަންކުރާ އުޅަނދުތައް | 24 މަސްދުވަސް | -/200 ރުފިޔާ |
| ހުއިފިލަނޑާ ހަމައެކަނި ސީރާކުރާ ފަރާތްތައް | 24 މަސްދުވަސް | -/100 ރުފިޔާ |
| ސީރާކުރުމުގެ އިތުރުން އެހެން ގޮތަކަށް ޕްރޮސެސްކުރާ ފަރާތްތައް | 24 މަސްދުވަސް | -/300 ރުފިޔާ |
| ފަރުމަހުގެ މަސްވެރިކަން ކުރާ އުޅަނދުތައް | 24 މަސްދުވަސް | -/250 ރުފިޔާ |
| އެކްސްޕޯޓްކުރާ ފަރާތްތަކަށާއި ރިޒޯޓްތަކަށް މެދުވެރިއެއްގެ ގޮތުން ފަރުމަހުގެ ބާވަތްތައް ވިއްކާ ފަރާތްތައް ނުވަތަ ކުންފުނިތައް | 24 މަސްދުވަސް | -/300 ރުފިޔާ |
| ފަރުމަހުގެ ބާވަތްތައް ޕްރޮސެސްކުރާ ފެސިލިޓީތައް | 24 މަސްދުވަސް | -/500 ރުފިޔާ |
ވީމާ، 2025 އޭޕްރިލް 13 ވަނަ ދުވަހުން ފެށިގެން މަސްވެރިކަމާއިބެހޭ ވުޒާރާގެ އިންފޮމޭޝަން ސިސްޓަމް (https://keyolhu.mv) މެދުވެރިކޮށް ލައިސަންސް ނެގުމުގެ މަސައްކަތް ކުރެއްވުން އެދެމެވެ. ކަމާބެހޭ އިތުރު މަޢުލޫމާތު ހޯދުމަށް މަސްވެރިކަމާބެހޭ ވުޒާރާގެ ނަންބަރު 3339072 ނުވަތަ 3339272 އަށް ގުޅުއްވުން އެދެމެވެ.